Yeye Mwenye Majibu Ya Yote

Nchi zilizoendelea, kuna matajiri wenye magonjwa ambayo bado madaktari hawajapata tiba wala suluhisho lake hivyo wanalipa pesa nyingi sana ili kugandisha miili yao, hivyo warudishwe kwenye uhai pale tiba itakapopatikana ili waweze kuishi muda mrefu zaidi.

Miaka ya nyuma, iliwezekana kulala bila kufunga milango kwa makomeo, pia watu walipaki magari yao nje bila kuyafunga hata ilipofika asubuhi hakukuwa na wizi wowote, lakini maisha ya leo tunafunga milango nyuma ya milango ya chuma na kuweka ulinzi wote, pamoja na uzio wa umeme lakini bado hatuko salama.

Mithali 14:12

Siku zote suluhisho la mwanadamu katika tatizo moja, kama hajaongozwa na Mungu hakika linatengeneza tatizo jingine kubwa zaidi hapo baadaye. Magari yanaturahisishia sana usafiri kila siku lakini pia ndicho chombo kinachosababisha ajali mbaya kila siku. Pombe ilitengenezwa kama sehemu ya starehe lakini ndio chanzo cha magonjwa sugu yasiyo na tiba hata sasa. Simu za mkononi zinaturahisishia sana kuwasiliana lakini ndio chanzo cha maovu mengi na ndoa kuvunjika.

Mithali 3:5 – 6

Mungu hakika ndiye muweza wa yote, yeye anaifahamu mipaka ya dunia, Yeye ndiye anayesimamisha falme na kuziangusha, Yeye ndiye anayetoa kibali kwa kila jambo, pia ni Yeye anayeijua sekunde inayofuata hata kesho na milele yote, Yeye anajua milele ina umbali wa kiasi gani, Yeye anauona mwanzo kutokea mwisho, Yeye anatujua kabla hata mimba hazijatungwa kwenye matumbo ya mama zetu, Yeye ni yule yule milele yote habadiriki. Unapojaribu kufanya mambo kwa ufahamu na njia zako hakika wewe umepotea.

1 wakorintho 1:25

Watafiti wanavumbua mambo mengi sana yanayoonekana mazuri, watu wanapata utajiri kutokana na jitihada zao katika maisha na mafanikio pia yanaonekana lakini kama sio mpango wa Mungu katika yote daima huwa ni ubatili tu, sawa na kujilisha upepo chini ya jua.

Solomon katika fahari yake alikuwa tajiri sana, alikuwa na mali kuliko mwanadamu yeyote aliyewahi kuishi, alioa wake 700 na akawa na Masuria 300 lakini mwisho alifahamu kuwa yote ni ubatili mtupu.

1 Wafalme 11:3 | Mhubiri 1:1 – 10

Jibu la Ukimwi analo Mungu, Jibu la kuvunjika kwa ndoa analo Mungu, Jibu la ugonjwa wa Kisukari, Kansa na Shinikizo la damu pia analo Mungu, Jibu la kuyumba kwa uchumi analo Mungu, Jibu la kuongezeka kwa maasi na vita analo Mungu, Jibu la utoaji mimba pia hakika ni Mungu pekee aliyenalo.

Ufunuo 3:17 – 19

Ukimtumainia mwanadamu leo atakusaidia bali kesho atakukimbia, yamkini atakushauri lililo jema leo lakini yawezekana kesho atakupotosha, maana binadamu tunabadirika ndio maana amelaaniwa mtu yule amtumainiaye mwanadamu. Lakini Mungu tu ndiye habadiriki, Naye atakupa jibu sahihi.