Ukikubali na Kutii

Ukubali na utiifu wetu kwenye sheria, amri na Neno la Mungu ni muhimu sana katika maisha yetu ya wokovu, na zaidi sana ili kuweza kusonga mbele tukimuona Mungu akitujenga upya na kufanya yaliyo makuu sana kupitia sisi.

Katika hali ya kawaida sana kwa kila binadamu, inakuwa rahisi sana kutii ila si kukubali, maana unatii ile mamlaka kutokana na hofu hivyo ukatekeleza ila ndani yako hujakubaliana na hilo jambo. Lakini kukubali kunakuwepo kutokana na Imani ndani yako, hasa Imani iliyo timilifu.

Isaya 1:19 Ukikubali na kutii utakula mema ya nchi….

Sheria ya Mungu ni nzuri sana kwani ipo ili kutulinda pamoja na kutuepusha na mabaya siku zote za maisha yetu. Mungu alipowaambia Adam na Eva wasile tunda la mti wa ujuzi wa mema na mabaya alitaka kuthibitisha kwamba wanamtii, lakini zaidi ya yote endapo wamekubaliana na kile anachokisema.

Mwanzo 2:16 – 17

Viumbe wanaoishi kwenye maji wamekubali  na wanatii sheria waliowekewa na Mungu, pia ndege wa angani hata wadudu na wanyama wa porini, ndio maana siku zote wanaishi bila shida. Lakini sisi binadamu ambao tuliumbwa kwa kwa mfano wa Mungu siku zote tunajaribu kuhakiki uhalisia wa kile ambacho Mungu amekisema.

Mathayo 6:31 – 34

Matatizo mengi katika maisha siku hizi ni kwasababu kila mtu anataka kuwa yeye na mahitaji yake, au kile ambacho yeye hasa anataka kukifanya. Ni kutokana na mahangaiko pamoja na msongo wa mawazo katika kizazi hiki tunaongezeko kubwa sana la magonjwa ya kansa, shinikizo la damu na kisukari. Hii ni kwakuwa hatutaki kutii na kukubaliana na ukweli kwamba kesho tumuachie Mungu, lakini pia ni jukumu letu kuutafuta ufalme wake kwanza na haki yake.

Bila Imani inakuwa ngumu sana kukubali, kwani pale unapomuamini mtu ndipo unapoweza kukubaliana naye. Usipomwamini mwajiri wako huwezi kuendelea kumtumikia, zaidi usipomuamini mwenzi wako inakuwa ni ngumu kuishi naye pamoja.

Panapokosekana Imani kunajengeka mashaka na woga ambao hutoka kwa Shetani. Ili kumuona Mungu katika uhalisia wake maishani mwetu lazima tuwe na Imani timilifu maana haiwezekani kumpendeza Yeye pasipo Imani.

2 Timotheo 2:11 – 13

Mtu mwenye utii na kukubali siku zote hubarikiwa, na katika mambo yake siku zote atafanikiwa na kuwa juu ya mataifa.

Kumbukumbu la Torati 28:1 - 14