Kile Kinachotushibisha

Mtu ambaye hali vyakula vyenye kuleta afya na kuulinda mwili ikiwa ni pamoja na kunywa maji kwa wingi hakika hatakuwa mwenye afya nzuri, na mara nyingi mtu huyu atasumbuliwa na magonjwa ya hapa na pale; ndio maana ukiungua daktari anasisitiza sana upate chakula bora pamoja na maji ya kutosha.

Wengi wetu tuko makini sana kuujali mwili, katika kuulisha chakula pamoja na tamaa zake, lakini tunasahau kuwa mwili ni mavumbi, na hakika mavumbini utarudi tu. Sote tunakula mara tatu kwa siku hasa kwa wengi wetu wenye maisha ya kawaida.

Mwanzo 3:19

Inatupasa kufahamu kuwa mtu wetu wa ndani (Roho) nayo pia inabidi kula na kushiba kila siku tena hata kula muda wote kwani mwili huu wa nyama hauishi milele ila roho ndiyo itakayoishi milele. Roho zetu zinahitaji kulishwa chakula sahihi ambacho ni Neno la Mungu. Kama ilivyo kawaida kuwa kile anachopanda mtu hakika ndicho anachovuna, kwani huwezi kupanda mahindi ukavuna karanga.

Wagalatia 6:7

Wengi tunapenda sana kusikiliza miziki, au kushiriki  mazungumzo ambayo hayatujengi wala kutusaidia kabisa, na pia nyakati tofauti tumekuwa tukitizama vipindi kwenye luninga ambavyo vinatujaza uovu, zaidi pia kuna magazeti mengi ambayo sisi tunaoifuata kweli hatutakiwi kujihusisha nayo kwakuwa yamkini usione ubaya wake sasa ila kadri muda unavyosonga ile mbegu iliyopandwa inakua na kuanza kuzaa matunda.

Mithali 15:14

Inatupasa tufahamu, unaposikiliza wimbo unaoelezea mtu na mwenzi wake wa zamani kwa muda, kitakachokuijia akilini ni mwezi wako wa zamani pia. Hizi tamthilia zinazoonyesha jinsi watu wasivyo waaminifu katika maisha na ndoa zao, zinapoujaza moyo wako kwa muda hakika kitakachokutokea ni wewe kukubaliana kwamba hiyo ndiyo hali ya maisha ya kuiendea na kuishi. Ukiishi kwa kusoma, kuangalia na kusikiliza mizaha hakika nawe unatakuwa na mizaha tu.

Mithali 23:7a

Katika maisha haya ya utandawazi, ambayo kila mtu ana uhuru wa kufanya chochote kile anachoona kinafaa, hata wazazi wanakosa haki ya kuwakemea watoto wao; inatupasa kukaa na kung’ang’ania katika sharia ya Mungu siku zote na muda wote. Si vema kupoteza wokovu wako wa thamani sana uliopewa bure kwa ajili ya gazeti la udaku, au tamthilia inayopita au mziki ambao unakuvutia sana kila unapousikiliza.

Wagalatia 6:8

Zaburi 119:37

Kama Daudi alivyoamua kutokujizuia kumtizama mke wa Uria alipokuwa akioga, hata ikampelekea kutenda dhambi moja baada ya nyingine; inawezekana kabisa sinema tunazozipenda, magazeti au miziki ikatupelekea kutenda dhambi mbele za Mungu. Tutambue leo na kumuomba Mungu atusaidie, zaidi tuwe watu wa kujizuia sana.