Imani Timilifu

Ilimpasa Bwana wetu Yesu Kristo kupitia mateso yote hata kufa ili sisi tupate kupona pamoja na ukombozi mbali na dhambi, lakini si hilo tu ila tupate ushindi katika Yeye kwa kukishinda kifo alipofufuka siku ya tatu. Tufurahi kwani yeye ameshinda yote, hivyo nasi tunapokuwa ndani yake hakika tutashida.

Yohana 16:33

Leo tunakumbuka kufufuka kwake Bwana wetu Yesu Kiristo, lakini haitakuwa na maana sana kama huyu Yesu hafufuki pamoja nasi miyoyoni mwetu, haina faida kabisa. Mmoja wa wahalifu kati ya wale wawili aliosurubiwa naye pale msalabani alimtizama na kusema Bwana unikumbuke utakapoingia katika ufalme wako.

Luka 23: 42 – 43

Imani ndani ya huyu mhalifu ilikuwa timilifu sana, maana walikuwa na Yesu msalabani, lakini bado aliamini kwamba hakika huyu ni Mungu mwenye uweza wote. Lakini katika upande mwingine tunaona jinsi Petro alivyomkana Yesu mara tatu kwa kukosa Imani, pia baada ya Yesu kufa wanafunzi wake walijifungia kwa hofu wakijua yote yameishia hapo.

Luka 24: 36 – 42

Inawezekana kabisa kwamba kama dada zake Lazaro ambao waliamini Yesu anaponya lakini walimuwekea mipaka katika kufufua, nasi pia inawezekana kabisa kwamba tunamfahamu Yesu na matendo yake ila Imani timilifu tunakosa, yamkini hata Imani kiasi cha chembe ya haradali tu ni shida. John 11: 17 – 25, 38 – 44.

Imani timilifu haiji hivi hivi ila ni kwa nguvu ya Roho Mtakatifu, kwani yote yaliyo ya Imani ni yale ya rohoni ambayo hukua hata yakaonekana nje. Tunaona wanafunzi baada ya kujazwa na Roho Mtakatifu walitoka kwa ujasiri kwenda kuihubiri injili.

Matendo ya Mitume 2:14 – 17 

Tunapokumbuka kufufuka kwa Yesu Kristo, inatupasa tukumbuke pia kupokea ile ahadi aliyotuahidi ya Msaidizi ambaye ni Roho Mtakatifu, ambaye kwa huyo tutaweza kuitenda kazi katika shamba la Bwana, vinginevyo siku zote hatutaweza kwa kukosa Imani iliyo timilifu.

Waebrania 11:6

Imani timilifu ni kama ya Stefano aliyetolewa nje na kupigwa mawe bila kubadili msimamo, pia ni kama ya Paul na Sila waliofungwa gerezani bila kubadili msimamo, na Imani ya namna hii inapopita kwenye majaribu inakuwa na nguvu zaidi. Imani timilifu ni kuamini hata kama hatuoni muujiza, hata kama ni wagonjwa mahututi na zaidi sana hata kama tumepoteza kila kitu.

Dada mmoja mateka nyakati za vita vya dunia aliandika kwa kukwangua ukutani kabla hajafa “Naamini katika mwanga hata kama siuoni, naamini katika upendo hata kama siuhisi na ninaamini katika Mungu hata kama akikaa kimya”

2 Timotheo 2:13